.jpg)
కాశీ వెళ్ళడం కంటే ముందు వెళ్లి తీరవలసిన క్షేత్రం ఒకటి ఉంది . దాని పేరు కుండలేశ్వరం . తూర్పు గోదావరి జిల్లాలో గోదావరి నదీ తీరాన ఆ క్షేత్రం ఉంది . అక్కడ గోదావరి నదిని వృద్ధ గౌతమి అని పిలుస్తారు . ఆ నదిలో స్నానం చేసి , కుండలేశ్వర స్వామికి అభిషేకం చేయించుకుని ఆ తరువాత కాశీ వెళ్లాలి . ఎందుకంటే కాశీ వెళ్ళిన ప్రతి ఒక్కరూ గంగలో స్నానం చేస్తారు . అప్పుడు గంగానది మనం చేసిన పాపాలు తాను స్వీకరించి మనల్ని పుణ్యాత్ములను చేస్తుంది . ఇలా ప్రతిరోజూ ఉదయం అందరి వద్దా పాపాలు స్వీకరించి తెల్లని రాజహంస లాంటి గంగానది సాయంత్రానికి నల్లని కాకి లాగ మారిపోతుంది . ఆ పాపభారం మోయడం గంగమ్మ తల్లికి చాలా కష్టం . కనుక ఎవరైనా పాపం చెయ్యని వారు వచ్చి స్నానం చేస్తే , వారు తనను కలుషితం చేయని కారణంగా గంగాదేవి చాలా సంతోషించి వారిని మనస్ఫూర్తిగా ఆశీర్వదిస్తుందట . కాశీ అయినా , హరిద్వార్ అయినా ఎక్కడ గంగా స్నానం చేస్తామో అక్కడకు వెళ్లే ముందు కుండలేశ్వరం వెళ్లి గోదావరి స్నానం చేసి కుండలేశ్వర స్వామిని ( ఈశ్వరుడు ) అర్చించుకుని ఆ తర్వాత ఆయా పుణ్య క్షేత్రాలకు వెళ్లాలి .
ఏమిటీ కుండలేశ్వరం కధ ? ఈ క్షేత్రంలో ప్రవహించే గోదావరి నదికి వ్యాస మహర్షి ఒక వరం ఇచ్చాడు . పార్వతీదేవి ఆజ్ఞ మేరకు వ్యాస మహర్షి కాశీని వదిలిపెట్టి , విశ్వేశ్వరుని దర్శించుకోలేని దుఃఖాన్ని పోగొట్టుకోవడం కోసం అనేక క్షేత్రాలు దర్శించుకుంటున్న తరుణంలో ఈ కుండలేశ్వరం వచ్చాడు . దక్షయజ్ఞం తరువాత యోగాగ్నిలో దగ్ధమైన సతీదేవి చెవి కుండలం పడిన ఈ క్షేత్రంలో గోదావరి స్నానం చేసి కుండలేశ్వర స్వామిని దర్శించి ఆయన కాశీ విశ్వనాథుని దర్శించుకున్న అనుభూతిని పొందాడు . అప్పుడు ఆయన ఇక్కడ ప్రవహించే గోదావరి నదికి ఒక అపురూపమైన వరం ఇచ్చాడు . భారత దేశంలో ప్రవహించే ప్రతి ఒక్క నదికీ 12 సంవత్సరాలకు ఒకసారి పుష్కరాలు వస్తాయి . ఆ పుష్కరాల సమయంలో నదీ స్నానం చేసిన వారు పాపవిముక్తులౌతారు . అయితే ఈ కుండలేశ్వర క్షేత్రంలో ప్రవహించే గోదావరి పాయకు మాత్రం ( వృద్ధ గౌతమి ) ప్రతిరోజూ పుష్కరాలే అని వ్యాస మహర్షి వరం ఇచ్చాడు . కనుక ఆ రోజు ఈరోజు అని లేకుండా ఏ రోజైనా ఈ క్షేత్రంలో గోదావరి స్నానం చేసిన వారికి పుష్కరస్నాన ఫలం వలన పాప విముక్తులవుతారు . ఆ తరువాత వారు కాశీ హరిద్వార్ వంటి గంగా తీరంలో ఉన్న క్షేత్రాలు దర్శించుకుంటే గంగానది యొక్క అనుగ్రహం వలన కోరుకునే ఒక కోరిక గంగానది తీరుస్తుంది అని పురాణ కథనం .
బస్సులో కానీ ,రైలులో కానీ , విమానంలో కానీ రాజమండ్రి చేరుకున్న తర్వాత , టాక్సీలో ఈ కుండలేశ్వరం వెళ్లవచ్చు . లేదా రాజమండ్రి నుంచి బస్సులో అమలాపురం వెళ్లి అక్కడ నుంచి ఆటోలో ఈ కుండలేశ్వరం వెళ్లవచ్చు . అమలాపురం నుండి కుండలేశ్వరం బస్సు కూడా ఉంటుంది కానీ అది పల్లెవెలుగు బస్సు . బస చేయాలంటే అమలాపురం లేదా రాజమండ్రిలో హోటల్ బుక్ చేసుకోవాలి . కుండలేశ్వరం చేరుకుని గోదావరి స్నానం చేసి కుండలం ఆకారంలో ఉన్న శివలింగాన్ని దర్శించుకుని పూజలు చేసుకోవచ్చు . రుక్మిణీ సత్యభామా సమేత వేణుగోపాలస్వామి ఆలయం కూడా శివాలయ ప్రాంగణంలో ఉన్నది .
వ్యాస పురాణం లోనూ , కాశీ ఖండం లోనూ ఈ కుండలేశ్వరం గూర్చి ప్రస్తావన ఉంది
No comments:
Post a Comment