॥ శ్రీసుబ్రహ్మణ్యకవచస్తోత్రమ్ ॥

॥ శ్రీసుబ్రహ్మణ్యకవచస్తోత్రమ్ ॥




అస్య శ్రీ సుబ్రహ్మణ్యకవచస్తోత్రమహామన్త్రస్య బ్రహ్మ ఋషిః,
అనుష్టుప్ఛన్దః, శ్రీ సుబ్రహ్మణ్యో దేవతా । ఓం నమ ఇతి బీజమ్ ।
భగవత ఇతి శక్తిః । సుబ్రహ్మణ్యాయేతి కీలకమ్ ।
సుబ్రహ్మణ్యప్రసాద సిద్ధ్యర్థే జపే వినియోగః ॥

కరన్యాసః ॥

సాం అఙ్గుష్ఠాభ్యాం నమః
సీం తర్జనీభ్యాం నమః
సూం మధ్యమాభ్యాం నమః
సైం అనామికాభ్యాం నమః
సౌం కనిష్ఠికాభ్యాం నమః
సః కరతలకరపృష్ఠాభ్యాం నమః ॥

అఙ్గ న్యాసః ॥

సాం హృదయాయ నమః
సీం శిరసే స్వాహా
సూం శికాయై వషట్
సైం కవచాయ హుం
సౌం నేత్రత్రయాయ వౌషట్
సః అస్త్రాయ ఫట్
భూర్భువఃసువరోమితి దిగ్బన్ధః ॥

ధ్యానమ్ ॥

సిన్దూరారుణమిన్దుకాన్తివదనం కేయూరహారాదిభిః
దివ్యైరాభరణేర్విభూషితతనుం స్వర్గాదిసౌఖ్యప్రదమ్ ।
అమ్భోజాభయశక్తికుక్కుటధరం రక్తాఙ్గరాగోజ్వలం
సుబ్రహ్మణ్యముపాస్మహే ప్రణమతాం భీతిప్రణాశోద్యతమ్ ॥

సుబ్రహ్మణ్యోగ్రతః పాతు సేనానీః పాతు పృష్ఠతః ।
గుహో మాం దక్షిణే పాతు వహ్నిజం పాతు వామతః ॥ ౧॥

శిరః పాతు మహాసేనః స్కన్దో రక్షేల్లలాటకమ్ ।
నేత్రో మే ద్వాదశాక్షశ్చ శ్రోత్రే రక్షతు విశ్వభృత్ ॥ ౨॥

ముఖం మే షణ్ముఖః పాతు నాసికాం శఙ్కరాత్మజః ।
ఓష్ఠౌ వల్లీపతిః పాతు జిహ్వాం పాతు షడాననః ॥ ౩॥

దేవసేనాపతిర్దన్తాన్ చుబుకం బహులాత్మజః ।  var  బహూలోద్భవః
కణ్ఠం నారకజిత్ పాతు బాహు ద్వాదశబాహుమాన్ ॥ ౪॥

 var  తారకజిత్పాతు బాహుద్వాదశ బాహుకః

హస్తౌ శక్తిధరః పాతు వక్షః పాతు శరోద్భవః ।
హృదయం వహ్నిభూః పాతు కుక్షిం పాత్వమ్బికాసుతః ॥ ౫॥

నాభిం శమ్భుసుతః పాతు కటిం పాతు హరాత్మజః ।
ఊరు పాతు గజారూఢో జానూ మే జాహ్నవీసుతః ॥ ౬॥

జఙ్ఘే విశాఖో మే పాతు పాదౌ మే శిఖివాహనః ।
సర్వాణ్యఙ్గానిభూతేశః సర్వధాతుంశ్చపావకిః ॥ ౭॥

 var  సర్వధాతంశ్చ తావకిః

సన్ధ్యాకాలే నిశీథిన్యాం దివాప్రాతర్జలేగ్నిషు ।
దుర్గమే చ మహారణ్యే రాజద్వారే మహాభయే ॥ ౮॥

తుములేరణ్యమధ్యే చ సర్వదుష్టమృగాదిషు ।
చోరాదిసాధ్వసేభేద్యే జ్వరాదివ్యాధి పీడనే ॥ ౯॥

దుష్టగ్రహాదిభీతౌ చ దుర్నిమిత్తాది భీషణే ।
అస్త్రశస్త్రనిపాతే చ పాతు మాం క్రౌఞ్చరన్ధకృత్ ॥ ౧౦॥

యః సుబ్రహ్మణ్యకవచం ఇష్టసిద్ధిప్రదం పఠేత్ ।
తస్య తాపత్రయం నాస్తి సత్యం సత్యం వదామ్యహమ్ ॥ ౧౧॥

ధర్మాథీ లభతే ధర్మమర్థార్థీ చార్థమాప్నుయాత్ ।
కామార్థి లభతే కామం మోక్షార్థీమోక్షమాప్నుయాత్ ॥ ౧౨॥

యత్ర యత్ర జపేద్భక్త్యా తత్ర సన్నిహితో గుహః ।
పూజాప్రతిష్ఠాకాలే చ జపకాలే పఠేదిదమ్ ॥ ౧౩॥

తేషామేవఫలావాప్తిః మహాపాతకనాశనమ్ ।
యః పఠేచ్ఛృణుయాద్భక్త్యా నిత్యన్దేవస్య సన్నిధౌ ॥ ౧౪॥

॥ ఇతి కుమారతన్త్రే కౌశికప్రశ్నే మహా సంహితాయాం
సుబ్రహ్మణ్యకవచం సమాప్తః ॥