🌹పాండవుల ప్రస్థానం హిమాలయాల్లో ఊర్ధ్వముఖంగా సాగుతున్నది.
🌿పాండవులూ వారితో కూడి శునకము నడుస్తూ వుండగా, మార్గమధ్యంలో ద్రౌపది ప్రస్థానం ముగిసి, మహాప్రస్థానంకి చేరుకున్నది. అది చూసి భీమసేనుడు, ' అగ్రజా ! ద్రౌపది ధర్మ తత్పరురాలు, పతివ్రతా కదా ! ఆమె అక్కడే ఎందుకు ఆగిపోవలసి వచ్చింది. ' అని అడిగాడు.
🌸ధర్మజుడు కొద్ధిసేపు మౌనం వహించి, భీమసేనుడు గుచ్చి గుచ్చి అడుగగా, ' భీమసేనా ! ఆమె అంతరాంతరాలలో అర్జునుని పై ప్రియత్వం యెక్కువగా వున్నది. ఆ పక్షపాతబుద్ధి వలన ముందుకు రాలేక పోయింది. ' అని సమాధానమిచ్చాడు.
🌿ఆపై కొద్ధిదూరం వెళ్ళగానే, సహదేవుడు పడిపోయాడు. మళ్ళీ భీముని సందేహం తీర్చడానికి, ' సహదేవునిలో అహంకారం పాలు యెక్కువగా వున్నది. అందువలన మనతో ప్రస్థానం కొనసాగించ లేకపోయాడు. ' అని చెప్పాడు ధర్మరాజు.
🌸మరి కొద్ధి దూరం వెళ్ళగానే, నకులుడు యిక ముందుకు రాలేక ఆగిపోయాడు. భీముడు మళ్ళీ అడుగగా , ' భీమసేనా ! నకులుడు అందరిలోకీ శ్రేష్ఠుడు. అయితే, అతనికి తన శారీరిక అందం మీద అభిమానం యెక్కువగా వున్నది. అదే అతని పతనానికి కారణం. ' అని చెప్పాడు.
🌿ఇంకొద్దిదూరం వెళ్ళగానే, అర్జునుడు పడిపోయాడు. ' అన్నా ! అర్జునుడు కూడా పడిపోయాడు. అర్జునునిలో కూడా బలహీనతలు వున్నవా ? ' అని ఆశ్చర్యంగా అడిగాడు, భీమసేనుడు. ' అర్జునుడు తాను అమిత పరాక్రమ వంతుడనని విర్రవీగుతూ, ఇతరుల శక్తి సామర్ధ్యాలను వొప్పుకునేవాడు కాదు. ' అని చెప్పి భీమసేనునితో, శునకము తో సహా యింకా ముందుకు వెళ్ళసాగాడు.
🌸మరి కొద్ధి దూరానికి, భీమసేనుడు కూడా ముందుకు రాలేకపోయాడు. భీమసేనుడు ఆగిపోతూ, నాలో యేమి బలహీన వున్నది అగ్రజా ! నేనెందుకు మీతో రాలేక పోతున్నాను. ' అని భారమైన కంఠంతో పెద్దగా అడిగాడు ధర్మజుని.
🌿 ' నాయనా ! భీమసేనా ! నీ భోజన ప్రియత్వం, అసహజమైన క్రోధ అహంకారాలు, నీ పతన హేతువులు. ' అనిచెప్పి ముందుకు సాగాడు, ధర్మరాజు. తోక ఆడించుకుంటూ, శునకం కూడా ఆయనను వెంబడించింది.
🌸అలా ముందుకు వెళ్లగా, వెళ్లగా, మేరుపర్వతాన్ని సమీపించేసరికి, స్వయంగా ఇంద్రుడే, తన రధాన్ని తీసుకుని యెదురుగా వచ్చి, ' ధర్మరాజా ! నేను మహేంద్రుడను. నిన్ను స్వయంగా సశరీరంగా స్వర్గానికి తీసుకు వెళదామని వచ్చాను. నీవాళ్లంతా, వారి సూక్ష్మ శరీరాలతో, ఈ సరికే స్వర్గానికిచేరారు.
🌿రా ! రధమెక్కు. మా సురలోకాన్ని పావనము చెయ్యి. ' అని అడిగాడు.
' నీ ఆదరణకు చాలా సంతోషం మహేంద్రా ! అయితే, నాతో పాటు, ఒక అనుకోని అతిధి కూడా వున్నాడు. ఆ జీవిని కూడా మీరు రధంలోనికి అనుమతిస్తే, నేను కూడా వస్తాను. ' అని వినయంగా అన్నాడు.
🌸ఎవరని అడుగగా, శునకాన్ని చూపించాడు ధర్మరాజు. మహేంద్రుడు నవ్వుతూ, స్వర్గంలో జంతుజాలంకి ప్రత్యేక అనుమతులు లేవు ధర్మజా ! ' అని అనగానే, తాను కూడా స్వర్గాన్ని త్యజించడానికి సిద్ధపడ్డాడు, ధర్మరాజు.
🌿వెంటనే, శునకం రూపంలో వున్న ధర్మదేవత ప్రత్యక్షమై, ధర్మరాజును ఆశీర్వదించి, ఈ నీ త్యాగబుద్ధే నిన్ను నిరంతరం కాపాడింది. శుభం భూయాత్. ' అని ఆశీర్వదించి, స్వర్గలోకానికి వెళ్లే రధం యెక్కడానికి ధర్మరాజుకు సహాయపడి, అంతర్ధానమయ్యాడు. ఇంద్రునితో సహా, ధర్మరాజు స్వర్గానికి సశరీరంగా వెళ్ళాడు.
మహాప్రస్థానం పర్వం సమాప్తం.
🌹స్వర్గారోహణ పర్వం ;🌹
🌸బొందితోనే స్వర్గానికి చేరిన ధర్మరాజు, తన శరీరంతోనే స్వర్గంలో తిరుగుతూ, సర్వ సుఖాలు అనుభవిస్తున్న దుర్యోధనుని చూసాడు.
🌿నరకకూపం లోనికి కూడా తొంగి చూసాడు ధర్మరాజు. అక్కడ నరకంలో బాధలను అనుభవిస్తున్న తన తమ్ములను, ద్రౌపదిని చూసాడు. ' ఇక్కడకు వచ్చినా నా మనసుకు కలతచెందే విషయాలే గోచరిస్తున్నాయి. ' అని బాధపడ్డాడు.
🌸అయితే, మహేంద్రుని ద్వారా ' జీవుడు పుణ్య పాపాలలో యేది తక్కువగా చేస్తే, దానిని ముందుగా అనుభవిస్తారు ' అని తెలుసుకుని వూరట చెందాడు.
🌿ఆ విధంగా స్వర్గ నరకాలలో తన వాళ్ళందరినీ చూసాడు, ధర్మరాజు.
ఆ తరువాత, మహేంద్రుని యేర్పాట్లపై, దివ్య మందాకినీ జలాలతో పవిత్రస్నానం చేసి, తన దేహం వదిలివేసి, దివ్యదేహంతో, దేవతామూర్తిగా శోభించి నిత్యశాంతిని అనుభవించాడు, ధర్మరాజు.
🌸 తన పరివారమంతా కొంతకాలానికి దేవతామూర్తుల వలే స్వర్గానికి చేరగా, అందరూ మదమాత్సర్యాలు లేని స్వర్గసుఖాలు అనుభవించారు.
🌿అని ఈ విధంగా మహాభారతగాధను సర్పయాగంలో వైశంపాయనుడు జనమేజయునకు వినిపించాడని, శౌనకాది మహామునులకు, సూతమహర్షి, నైమిశారణ్యంలో చెప్పాడు.
🌸ఈ మహాభారతగాధను భక్తి శ్రధ్ధలతో విన్నవారికి అన్నింటా జయం కలుగుతుందనీ, అంతమున మోక్షం సిద్ధిస్తుందని, ఫలశ్రుతి కూడా చెప్పాడు. ..🚩🌞🙏🌹🎻
🙏🌹మంగళం మహత్.
శుభం భూయాత్.....🌹🙏
No comments:
Post a Comment