శ్రీగణేశాయ నమః ..
ధర్మార్థకామమోక్షాఖ్యచతుర్వర్గప్రదాయినౌ .
వందే హరిహరౌ దేవౌ త్రైలోక్యపరిపాయినౌ .. 1..
ఏకమూర్తీ ద్విధా భిన్నౌ సంసారార్ణవతారకౌ .
వందేఽహం కామదౌ దేవౌ సతతం శివకేశవౌ .. 2..
దయామయౌ దీనదరిద్రతాపహౌ మహౌజసౌ మాన్యతమౌ సదా సమౌ .
ఉదారలీలాలలితౌ సితాసితౌ నమామి నిత్యం శివకేశవావహం .. 3..
అనంతమాహాత్మ్యనిధీ విధిస్తుతౌ శ్రియా యుతౌ లోకవిధానకారిణౌ .
సురాసురాధీశనుతౌ నుతౌ జగత్పతీ సదా విధత్తాం శివకేశవౌ శివం .. 4..
జగత్త్రయీపాలననాశకారకౌ ప్రసన్నహాసౌ విలసత్సదాననౌ .
మహాబలౌ మంజులమూర్తిధారిణౌ శివం విధత్తాం శివకేశవౌ సదా .. 5..
మహస్వినౌ మోదకరౌ పరౌ వరౌ మునీశ్వరైః సేవితపాదపంకజౌ .
అజౌ సుజాతౌ జగదీశ్వరౌ సదా శివం విధత్తాం శివకేశవౌ మమ .. 6..
నమోఽస్తు నిత్యం శివికేశవాభ్యాం స్వభక్తసంరక్షణతత్పరాభ్యాం .
దేవేశ్వరాభ్యాం కరుణాకరాభ్యాం లోకత్రయీనిర్మితికారణాభ్యాం .. 7..
సలీలశీలౌ మహనీయమూర్తీ దయాకరౌ మంజులసచ్చరిత్రౌ .
మహోదయౌ విశ్వవినోదహేతూ నమామి దేవౌ శివకేశవౌ తౌ .. 8..
త్రిశూలపాణిం వరచక్రపాణిం పీతాంబరం స్పష్టదిగంబరం చ .
చతుర్భుజం వా దశబాహుయుక్తం హరిం హరం వా ప్రణమామి నిత్యం .. 9..
కపాలమాలాలలితం శివం చ సద్వైజయంతీస్రగుదారశోభం .
విష్ణుం చ నిత్యం ప్రణిపత్య యాచే భవత్పదాంభోరుహయోః స్మృతిః స్తాత్ .. 10..
శివ త్వమేవాఽసి హరిస్వరూపో హరే త్వమేవాఽసి శివస్వరూపః .
భ్రాంత్యా జనాస్త్వాం ద్వివిధస్వరూపం పశ్యంతి మూఢా నను నాశహేతోః .. 11..
హరే జనా యే శివరూపిణం త్వాం త్వద్రూపమీశం కలయంతి నిత్యం .
తే భాగ్యవంతః పురుషాః కదాఽపి న యాంతి భాస్వత్తనయస్య గేహం .. 12..
శంభో జనా యే హరిరూపిణం త్వాం భవత్స్వరూపం కమలాలయేశం .
పశ్యంతి భక్త్యా ఖలు తే మహాంతౌ యమస్య నో యాంతి పురం కదాచిత్ .. 13..
శివే హరౌ భేదధియాఽఽధియుక్తా ముక్తిం లభంతే న జనా దురాపాం .
భుక్తిం చ నైవేహ పరంతు దుఃఖం సంసారకూపే పతితాః ప్రయాంతి .. 14..
హరే హరౌ భేదదృశో భృశం వై సంసారసింధౌ పతితాః సతాపాః .
పాపాశయా మోహమయాంధకారే భ్రాంతా మహాదుఃఖభరం లభంతే .. 15..
సంతో లసంతః సుతరాం హరౌ చ హరే చ నిత్యం వహుభక్తిమంతః .
అంతర్మహాంతౌ శివకేశవౌ తౌ ధ్యాయంత ఉచ్చైర్ముదమాప్నువంతి .. 16..
హరౌ హరే చైక్యముదారశీలాః పశ్యంతి శశ్వత్సుఖదాయిలీలాః .
తే భుక్తిముక్తీ సమవాప్య నూనం సుఖం దురాపం సుతరాం లభంతే .. 17..
శివే శివేశేఽపి చ కేశవే చ పద్మాపతౌ దేవవరే మహాంతః .
భేదం న పశ్యంతి పరంతు సంతస్తయోరభేదం కలయంతి సత్యం .. 18..
రమాపతిం వా గిరిజాపతిం వా విశ్వేశ్వరం వా జగదీశ్వరం వా .
పినాకపాణిం ఖలు శార్ఙ్గపాణిం హరి హరం వా ప్రణమామి నిత్యం .. 19..
సురేశ్వరం వా పరమేశ్వరం వా వైకుంఠలోకస్థితమచ్యుతం వా .
కైలాసశైలస్థితమీశ్వరం వా విష్ణుం చ శంభుం చ నమామి నిత్యం .. 20..
హరిర్దయార్ద్రాశయతాం ప్రయాతో హరో దయాలూత్తమభావమాప్తః .
అనేకదివ్యాస్త్రధరః పరేశః పాయాదజస్రం కృపయా నతం మాం .. 21..
శేషోఽస్తి యస్యాభరణత్వమాప్తో యద్వా సుశయ్యాత్వమితః సదైవ .
దేవః స కోఽపీహ హరిర్హరో వా కరోతు మే మంజులమంగలం ద్రాక్ .. 22..
హరిం హరం చాపి భజంతి భక్త్యా విభేదబుద్ధిం ప్రవిహాయ నూనం .
సిద్ధా మహాంతో మునయో మహేచ్ఛాః స్వచ్ఛాశయా నారదపర్వతాద్యాః .. 23..
సనత్కుమారాదయ ఉన్నతేచ్ఛా మోహేన హీనా మునయో మహాంతః .
స్వాంతఃస్థితం శంకరమచ్యుతం చ భేదం పరిత్యజ్య సదా భజంతే .. 24..
శిష్టా వసిష్ఠాదయ ఆత్మనిష్ఠాః శ్రేష్ఠాః స్వధర్మావనకర్మచిత్తాః .
హృత్తాపహారం మలహీనచిత్తా హరిం హరం చైకతయా భజంతే .. 25..
అన్యే మహాత్మాన ఉదారశీలా భృగ్వాదయో యే పరమర్షయస్తే .
పశ్యంతి చైక్యం హరిశర్వయోః శ్రీసంయుక్తయోరత్ర న సంశయోఽస్తి .. 26..
ఇంద్రాదయో దేవవరా ఉదారా త్రైలోక్యసంరక్షణదత్తచిత్తాః .
హరిం హరం చైకస్వరూపమేవ పశ్యంతి భక్త్యా చ భజంతి నూనం .. 27..
సర్వేషు వేదేషు ఖలు ప్రసిద్ధవైకుంఠకైలాసగయోః సుధామ్నోః .
ముకుందబాలేందువతంసయోః సచ్చరిత్రయోరీశ్వరయోరభేదః .. 28..
సర్వాణి శాస్త్రాణి వదంతి నూనం హరేర్హరస్యైక్యముదారమూర్తేః .
నాస్త్యత్ర సందేహలవోఽపి సత్యం నిత్యం జనా ధర్మధనా గదంతి .. 29..
సర్వైః పురాణైరిదమేవ సూక్తం యద్విష్ణుశంభోర్మహనీయమూర్త్యోః .
ఐక్యం సదైవాఽస్తి న భేదలేశోఽప్యస్తీహ చింత్యం సుజనైస్తదేవం .. 30..
భేదం ప్రపశ్యంతి నరాధమా యే విష్ణౌ చ శంభౌ చ దయానిధానే .
తే యాంతి పాపాః పరితాపయుక్తా ఘోరం విశాలం నిరయస్య వాసం .. 31..
భూతాధిపం వా విబుధాధిపం వా రమేశ్వరం వా పరమేశ్వరం వా .
పీతాంబరం వా హరిదంబరం వా హరిం హరం వా పురుషా భజధ్వం .. 32..
మహస్వివర్యం కమనీయదేహముదారసారం సుఖదాయిచేష్టం .
సర్వేష్టదేవం దురితాపహారం విష్ణుం శివం వా సతతం భజధ్వం .. 33..
శివస్య విష్ణోశ్చ విభాత్యభేదో వ్యాసాదయోఽపీహ మహర్షయస్తే .
సర్వజ్ఞభావం దధతో నితాంతం వదంతి చైవం కలయంతి సంతః .. 34..
మహాశయా ధర్మవిధానదక్షా రక్షాపరా నిర్జితమానసా యే .
తేఽపీహ విజ్ఞాః సమదర్శినో వై శివస్య విష్ణోః కలయంత్యభేదం .. 35..
హరిరేవ హరో హర ఏవ హరిర్న హి భేదలవోఽపి తయోః ప్రథితః .
ఇతి సిద్ధమునీశయతీశవరా నిగదంతి సదా విమదాః సుజనాః .. 36..
హర ఏవ హరిర్హరిరేవ హరో హరిణా చ హరేణ చ విశ్వమిదం .
ప్రవినిర్మితమేతదవేహి సదా విమదో భవ తౌ భజ భావయుతః .. 37..
హరిరేవ బభూవ హరః పరమో హర ఏవ బభూవ హరిః పరమః .
హరితా హరతా చ తథా మిలితా రచయత్యఖిలం ఖలు విశ్వమిదం .. 38..
వృషధ్వజం వా గరుడధ్వజం వా గిరీశ్వరం వా భువనేశ్వరం వా .
పతిం పశూనామథవా యదూనాం కృష్ణం శివం వా విబుధా భజంతే .. 39..
భీమాకృతిం వా రుచిరాకృతిం వా త్రిలోచనం వా సమలోచనం వా .
ఉమాపతిం వాఽథ రమాపతిం వా హరిం హరం వా మునయో భజంతే .. 40..
హరిః స్వయం వై హరతాం ప్రయాతో హరస్తు సాక్షాద్ధరిభావమాప్తః .
హరిర్హరశ్చాపి జగజ్జనానాముపాస్యదేవౌ స్త ఇతి ప్రసిద్ధిః .. 41..
హరిర్హి సాక్షత్ హర ఏవ సిద్ధో హరో హి సాక్షాద్ధదిరేవ చాస్తే .
హీరర్హరశ్చ స్వయమేవ చైకో ద్విరూపతాం కార్యవశాత్ ప్రయాతః .. 42..
హరిర్జగత్పాలనకృత్ప్రసిద్ధో హరో జగన్నాశకరః పరాత్మా .
స్వరూపమాత్రేణ భిదామవాప్తౌ ద్వావేకరూపౌ స్త ఇమౌ సురేశౌ .. 43..
దయనిధానం విలసద్విధానం దేవప్రధానం నను సావధానం .
సానందసన్మానసభాసమానం దేవం శివం వా భజ కేశవం వా .. 44..
శ్రీకౌస్తుభాభరణమిందుకలావతంసం
కాలీవిలాసినమథో కమలావిలాసం .
దేవం మురారిమథ వా త్రిపురారిమీశం
భేదం విహాయ భజ భో భజ భూరి భక్త్యా .. 45..
విష్ణుః సాక్షాచ్ఛంభురేవ ప్రసిద్ధః శంభుః సాక్షాద్విష్ణురేవాస్తి నూనం .
నాస్తి స్వల్పోఽపీహ భేదావకాశః సిద్ధాంతోఽయం సజ్జనానాం సముక్తః .. 46..
శంభుర్విష్ణుశ్చైకరూపో ద్విమూర్తిః సత్యం సత్యం గద్యతే నిశ్చితం సత్ .
అస్మిన్మిథ్యా సంశయం కుర్వతే యే పాపాచారాస్తే నరా రాక్షసాఖ్యాః .. 47..
విష్ణౌ శంభౌ నాస్తి భేదావభాసః సంఖ్యావంతః సంత ఏవం వదంతి .
అంతః కించిత్సంవిచింత్య స్వయం ద్రాక్ భేదం త్యక్త్వా తౌ భజస్వ ప్రకామం .. 48..
విష్ణోర్భక్తాః శంభువిద్వేషసక్తాః శంభోర్భక్తా విష్ణువిద్వేషిణో యే .
కామక్రోధాంధాః సుమందాః సనిందా విందంతి ద్రాక్ తే నరా దుఃఖజాలం .. 49..
విష్ణౌ శంభౌ భేదబుద్ధిం విహాయ భక్త్యా యుక్తాః సజ్జనా యే భజంతే .
తేషాం భాగ్యం వస్తుమీశో గురుర్నో సత్యం సత్యం వచ్మ్యంహ విద్ధి తత్త్వం .. 50..
హరేర్విరోధీ చ హరస్య భక్తో హరస్య వైరీ చ హరేశ్చ భక్తః .
సాక్షాదసౌ రాక్షస ఏవ నూనం నాస్త్యత్ర సందేహలవోఽపి సత్యం .. 51..
శివం చ విష్ణుం చ విభిన్నదేహం పశ్యంతి యే మూఢధియోఽతినీచాః .
తే కిం సుసద్భిః సుతరాం మహద్భిః సంభాషణీయాః పురుషా భవంతి .. 52..
అనేకరూపం విదితైకరూపం మహాంతముచ్చైరతిశాంతచిత్తం .
దాంతం నితాంతం శుభదం సుకాంతం విష్ణుం శివం వా భజ భూరిభక్త్యా .. 53..
హరే మురారే హర హే పురారే విష్ణో దయాలో శివ హే కృపాలో .
దీనం జనం సర్వగుణైర్విహీనం మాం భక్తమార్తం పరిపాహి నిత్యం .. 54..
హే హే విష్ణో శంభురూపస్త్వమేవ హే హే శంభో విష్ణురూపస్త్వమేవ .
సత్యం సర్వే సంత ఏవం వదంతః సంసారాబ్ధిం హ్యంజసా సంతరంతి .. 55..
విష్ణుః శంభుః శంభురేవాస్తి విష్ణుః శంభుర్విష్ణుర్విష్ణురేవాస్తి శంభుః .
శంభౌ విష్ణౌ చైకరూపత్వమిష్టం శిష్టా ఏవం సర్వదా సంజపంతి .. 56..
దైవీ సంపద్విద్యతే యస్య పుంసః శ్రీమాన్ సోఽయం సర్వదా భక్తియుక్తః .
శంభుం విష్ణుం చైకరూపం ద్విదేహం భేదం త్యక్త్వా సంభజన్మోక్షమేతి .. 57..
యేషాం పుంసామాసురీ సంపదాస్తే మృత్యోర్గ్రాసాః కామలోభాభిభూతాః .
క్రోధేనాంధా బంధయుక్తా జనాస్తే శంభుం విష్ణుం భేదబుద్ధ్యా భజంతే .. 58..
కల్యాణకారం సుఖదప్రకారం వినిర్వికారం విహితోపకారం .
స్వాకారమీశం న కృతాపకారం శివం భజధ్వం కిల కేశవం చ .. 59..
సచ్చిత్స్వరూపం కరుణాసుకూపం గీర్వాణభూపం వరధర్మయూపం .
సంసారసారం సురుచిప్రసారం దేవం హరిం వా భజ భో హరం వా .. 60..
ఆనందసింధుం పరదీనబంధుం మోహాంధకారస్య నికారహేతుం .
సద్ధర్మసేతుం రిపుధూమకేతుం భజస్వ విష్ణుం శివమేకబుద్ధ్యా .. 61..
వేదాంతసిద్ధాంతమయం దయాలుం సత్సాంఖ్యశాస్త్రప్రతిపాద్యమానం .
న్యాయప్రసిద్ధం సుతరాం సమిద్ధం భజస్వ విష్ణుం శివమేకబుద్ధ్యా .. 62..
పాపాపహారం రుచిరప్రచారం కృతోపకారం విలసద్విహారం .
సద్ధర్మధారం కమనీయదారం సారం హరిం వా భజ భో హరం వా .. 63..
విష్ణౌ హరౌ భేదమవేక్షమాణః ప్రాణీ నితాంతం ఖలు తాంతచేతాః . - ఆద్దేద్.
ప్రేతాధిపస్యైతి పురం దురంతం దుఃఖం చ తత్ర ప్రథితం ప్రయాతి .. 64..
భో భో జనా జ్ఞానధనా మనాగప్యర్చ్యే హరౌ చాపి హరే చ నూనం .
భేదం పరిత్యజ్య మనో నిరుధ్య సుఖం భవంతః ఖలు తౌ భజంతు .. 65..
ఆనందసన్మందిరమిందుకాంతం శాంతం నితాంతం భువనాని పాంతం .
భాంతం సుదాంతం విహితాసురాంతం దేవం శివం వా భజ కేశవం వా .. 66..
హే హే హరే కృష్ణ జనార్దనేశ శంభో శశాంకాభరణాధిదేవ .
నారాయణ శ్రీశ జగత్స్వరూప మాం పాహి నిత్యం శరణం ప్రపన్నం .. 67..
విష్ణో దయాలోఽచ్యుత శార్ఙ్గపాణే భూతేశ శంభో శివ శర్వ నాథ .
ముకుంద గోవింద రమాధిపేశ మాం పాహి నిత్యం శరణం ప్రపన్నం .. 68..
కల్యాణకారిన్ కమలాపతే హే గైరీపతే భీమ భవేశ శర్వ .
గిరీశ గౌరీప్రియ శూలపాణే మాం పాహి నిత్యం శరణం ప్రపత్రం .. 69..
హే శర్వ హే శంకర హే పురారే హే కేశవ హే కృష్ణ హరే మురారే .
హే దీనబంధో కరుణైకసింధో మాం పాహి నిత్యం శరణం ప్రపన్నం .. 70..
హే చంద్రమౌలే హరిరూప శంభో హే చక్రపాణే శివరూప విష్ణో .
హే కామశత్రో ఖలు కామతాత మాం పాహి నిత్యం భగవన్నమస్తే .. 71..
సకలలోకపశోకవినాశినౌ పరమరమ్యతయా ప్రవికాశినౌ .
అఘసమూహవిదారణకారిణౌ హరిహరౌ భజ మూఢ భిదాం త్యజ .. 72..
హరిః సాక్షాద్ధరః ప్రోక్తో హరః సాక్షాద్ధరిః స్మృతః .
ఉభయోరంతరం నాస్తి సత్యం సత్యం నం సంశయః .. 73..
యో హరౌ చ హరే సాక్షాదేకమూర్తౌ ద్విధా స్థితే .
భేదం కరోతి మూఢాత్మా స యాతి నరకం ధ్రువం .. 74..
యస్య బుద్ధిర్హరౌ చాపి హరే భేదం చ పశ్యతి .
స నరాధమతాం యాతో రోగీ భవతి మానవః .. 75..
యో హరౌ చ హరే చాపి భేదబుద్ధిం కరోత్యహో .
తస్మాన్మూఢతమో లోకే నాన్యః కశ్చన విద్యతే .. 76..
ముక్తిమిచ్ఛసి చేత్తర్హి భేదం త్యజ హరౌ హరే .
అన్యథా జన్మలక్షేషు ముక్తిః ఖలు సుదుర్లభా .. 77..
విష్ణోః శివస్య చాభేదజ్ఞానాన్ముక్తిః ప్రజాయతే .
ఇతి సద్వేదవాక్యానాం సిద్ధాంతః ప్రతిపాదితః .. 78..
విష్ణుః శివః శివో విష్ణురితి జ్ఞానం ప్రశిష్యతే .
ఏతజ్జ్ఞానయుతో జ్ఞాని నాన్యథా జ్ఞానమిష్యతే .. 79..
హరిర్హరో హరశ్చాపి హరిరస్తీతి భావయన్ .
ధర్మార్థకామమోక్షాణామధికారీ భవేన్నరః .. 80..
హరిం హరం భిన్నరూపం భావయత్యధమో నరః .
స వర్ణసంకరో నూనం విజ్ఞేయో భావితాత్మభిః .. 81..
హర శంభో హరే విష్ణో శంభో హర హరే హర .
ఇతి నిత్యం జపన్ జంతుర్జీవన్ముక్తో హి జాయతే .. 82..
న హరిం చ హరం చాపి భేదబుద్ధ్యా విలోకయేత్ .
యదీచ్ఛేదాత్మనః క్షేమం బుద్ధిమాన్ కుశలో నరః .. 83..
హరే హర దయాలో మాం పాహి పాహి కృపాం కురు .
ఇతి సంజపనాదేవ ముక్తిః ప్రాణౌ ప్రతిష్ఠితా .. 84..
హరిం హరం ద్విధా భిన్నం వస్తుతస్త్వేకరూపకం .
ప్రణమామి సదా భక్త్యా రక్షతాం తౌ మహేశ్వరౌ .. 85..
ఇదం హరిహరస్తోత్రం సూక్తం పరమదుర్లభం .
ధర్మార్థకామమోక్షాణాం దాయకం దివ్యముత్తమం .. 86..
శివకేశవయోరైక్యప్రతిపాదకమీడితం .
పఠేయుః కృతినః శాంతా దాంతా మోక్షాభిలాషిణః .. 87..
ఏతస్య పఠనాత్సర్వాః సిద్ధయో వశగాస్తథా .
దేవయోర్విష్ణుశివయోర్భక్తిర్భవతి భూతిదా .. 88..
ధర్మార్థీ లభతే ధర్మమర్థార్థీ చార్థమశ్నుతే .
కామార్థీ లభతే కామం మోక్షార్థీ మోక్షమశ్నుతే .. 89..
దుర్గమే ఘోరసంగ్రామే కాననే వధబంధనే .
కారాగారేఽస్య పఠనాజ్జాయతే తత్క్షణం సుఖీ .. 90..
వేదే యథా సామవేదో వేదాంతో దర్శనే యథా .
స్మృతౌ మనుస్మృతిర్యద్వత్ వర్ణేషు బ్రాహ్మణో యథా .. 91..
యథాఽఽశ్రమేషు సన్న్యాసో యథా దేవేషు వాసవః .
యథాఽశ్వత్థః పాదపేషు యథా గంగా నదీషు చ .. 92..
పురాణేషు యథా శ్రేష్ఠం మహాభారతముచ్యతే .
యథా సర్వేషు లోకేషు వైకుంఠః పరమోత్తమః .. 93..
యథా తీర్థేషు సర్వేషు ప్రయాగః శ్రేష్ఠ ఈరితః .
యథా పురీషు సర్వాసు వరా వారాణసీ మతా .. 94..
యథా దానేషు సర్వేషు చాన్నదానం మహత్తమం .
యథా సర్వేషు ధర్మేషు చాహింసా పరమా స్మృతా .. 95..
యథా సర్వేషు సౌఖ్యేషు భోజనం ప్రాహురుత్తమం .
తథా స్తోత్రేషు సర్వేషు స్తోత్రమేతత్పరాత్పరం .. 96..
అన్యాని యాని స్తోత్రాణి తాని సర్వాణి నిశ్చితం .
అస్య స్తోత్రస్య నో యాంతి షోడశీమపి సత్కలాం .. 97..
భూతప్రేతపిశాచాద్యా బాలవృద్ధగ్రహాశ్చ యే .
తే సర్వే నాశమాయాంతి స్తోత్రస్యాస్య ప్రభావతః .. 98..
యత్రాస్య పాఠో భవతి స్తోత్రస్య మహతో ధువం .
తత్ర సాక్షాత్సదా లక్ష్మీర్వసత్యేవ న సంశయః .. 99..
అస్య స్తోత్రస్య పాఠేన విశ్వేశౌ శివకేశవౌ .
సర్వాన్మనోరథాన్పుంసాం పూరయేతాం న సంశయః .. 100..
పుణ్యం పుణ్యం మహత్పుణ్యం స్తోత్రమేతద్ధి దుర్లభం .
భో భో ముముక్షవః సర్వే యూయం పఠత సర్వదా .. 101..
ఇత్యచ్యుతాశ్రమస్వామివిరచితం శ్రీహరిహరాద్వైతస్తోత్రం సంపూర్ణం .
సర్వే జనాః సుఖినో భవంతు,
శుభమస్తు.
వివాహ పొంతనలు , శుభ ముహూర్తాలు,జ్యోతిషం , న్యూమరాలజీ(పిల్లల పేర్లు, పెద్దల పేరులో మార్పులు, బిసినెస్ నేమ్స్), సైంటిఫిక్ వాస్తు,ప్రాణిక్ హీలింగ్, జాతక సంబంధ పరిష్కారాలకు(వివాహం, ఉద్యోగం, విదేశీ యానం,గృహం, సంబంధ భా౦దవ్యాలు,శత్రునాశనం,కోర్ట్ కేసు లు ,ఆర్దికలావాదేవీలు,etc), పూజలు,హోమాలు,వివాహ౦,దేవాలయ ప్రతిష్ట, గృహ ప్రవేశ౦ శాంతి పూజలు సర్వీసెస్ కొరకు, ఆధ్యాత్మిక వస్తువుల కొరకు సంప్రదించండి.
follow us :
plz like , share , follow and subscribe
facebook page
YouTube
Printerest
Twitter
Instagram
Blog
జ్యోతిష రత్న, జ్యోతిష రత్నాకర, వాస్తు విశారద
HAVANIJAAA
(M.A (Astro), M.A.(Telugu) , M.A.(English), M.A( Sanskrit), MSW, LLB)
శ్రీ విధాత పీఠం
Ph. no: 9666602371
No comments:
Post a Comment