దుర్గా నక్షత్ర మాలికా స్తుతి

విరాటనగరం రమ్యం గచ్ఛమానో యుధిష్ఠిరః |
అస్తువన్మనసా దేవీం దుర్గాం త్రిభువనేశ్వరీమ్ || ౧ ||

యశోదాగర్భసమ్భూతాం నారాయణవరప్రియామ్ |
నన్దగోపకులేజాతాం మఙ్గళ్యాం కులవర్ధనీమ్ || ౨ ||

కంసవిద్రావణకరీమ్ అసురాణాం క్షయఙ్కరీమ్ |
శిలాతటవినిక్షిప్తామ్ ఆకాశం ప్రతిగామినీమ్ || ౩ ||

వాసుదేవస్య భగినీం దివ్యమాల్య విభూషితామ్ |
దివ్యామ్బరధరాం దేవీం ఖడ్గఖేటకధారిణీమ్ || ౪ ||

భారావతరణే పుణ్యే యే స్మరన్తి సదాశివామ్ |
తాన్వై తారయతే పాపాత్ పఙ్కేగామివ దుర్బలామ్ || ౫ ||

స్తోతుం ప్రచక్రమే భూయో వివిధైః స్తోత్రసమ్భవైః |
ఆమన్త్ర్య దర్శనాకాఙ్క్షీ రాజా దేవీం సహానుజః || ౬ ||

నమో‌உస్తు వరదే కృష్ణే కుమారి బ్రహ్మచారిణి |
బాలార్క సదృశాకారే పూర్ణచన్ద్రనిభాననే || ౭ ||

చతుర్భుజే చతుర్వక్త్రే పీనశ్రోణిపయోధరే |
మయూరపింఛవలయే కేయూరాఙ్గదధారిణి || ౮ ||

భాసి దేవి యదా పద్మా నారాయణపరిగ్రహః |
స్వరూపం బ్రహ్మచర్యం చ విశదం తవ ఖేచరి || ౯ ||

కృష్ణచ్ఛవిసమా కృష్ణా సఙ్కర్షణసమాననా |
బిభ్రతీ విపులౌ బాహూ శక్రధ్వజసముచ్ఛ్రయౌ || ౧౦ ||

పాత్రీ చ పఙ్కజీ కణ్ఠీ స్త్రీ విశుద్ధా చ యా భువి |
పాశం ధనుర్మహాచక్రం వివిధాన్యాయుధాని చ || ౧౧ ||

కుణ్డలాభ్యాం సుపూర్ణాభ్యాం కర్ణాభ్యాం చ విభూషితా |
చన్ద్రవిస్పార్ధినా దేవి ముఖేన త్వం విరాజసే || ౧౨ ||

ముకుటేన విచిత్రేణ కేశబన్ధేన శోభినా |
భుజఙ్గా‌உభోగవాసేన శ్రోణిసూత్రేణ రాజతా || ౧౩ ||

భ్రాజసే చావబద్ధేన భోగేనేవేహ మన్దరః |
ధ్వజేన శిఖిపింఛానామ్ ఉచ్ఛ్రితేన విరాజసే || ౧౪ ||

కౌమారం వ్రతమాస్థాయ త్రిదివం పావితం త్వయా |
తేన త్వం స్తూయసే దేవి త్రిదశైః పూజ్యసే‌உపి చ || ౧౫ ||

త్రైలోక్య రక్షణార్థాయ మహిషాసురనాశిని |
ప్రసన్నా మే సురశ్రేష్ఠే దయాం కురు శివా భవ || ౧౬ ||

జయా త్వం విజయా చైవ సఙ్గ్రామే చ జయప్రదా |
మమా‌உపి విజయం దేహి వరదా త్వం చ సామ్ప్రతమ్ || ౧౭ ||

విన్ధ్యే చైవ నగశ్రేష్టే తవ స్థానం హి శాశ్వతమ్ |
కాళి కాళి మహాకాళి సీధుమాంస పశుప్రియే || ౧౮ ||

కృతానుయాత్రా భూతైస్త్వం వరదా కామచారిణి |
భారావతారే యే చ త్వాం సంస్మరిష్యన్తి మానవాః || ౧౯ ||

ప్రణమన్తి చ యే త్వాం హి ప్రభాతే తు నరా భువి |
న తేషాం దుర్లభం కిఞ్చిత్ పుత్రతో ధనతో‌உపి వా || ౨౦ ||

దుర్గాత్తారయసే దుర్గే తత్వం దుర్గా స్మృతా జనైః |
కాన్తారేష్వవపన్నానాం మగ్నానాం చ మహార్ణవే || ౨౧ ||
(దస్యుభిర్వా నిరుద్ధానాం త్వం గతిః పరమా నృణామ)

జలప్రతరణే చైవ కాన్తారేష్వటవీషు చ |
యే స్మరన్తి మహాదేవీం న చ సీదన్తి తే నరాః || ౨౨ ||

త్వం కీర్తిః శ్రీర్ధృతిః సిద్ధిః హ్రీర్విద్యా సన్తతిర్మతిః |
సన్ధ్యా రాత్రిః ప్రభా నిద్రా జ్యోత్స్నా కాన్తిః క్షమా దయా || ౨౩ ||

నృణాం చ బన్ధనం మోహం పుత్రనాశం ధనక్షయమ్ |
వ్యాధిం మృత్యుం భయం చైవ పూజితా నాశయిష్యసి || ౨౪ ||

సో‌உహం రాజ్యాత్పరిభ్రష్టః శరణం త్వాం ప్రపన్నవాన్ |
ప్రణతశ్చ యథా మూర్ధ్నా తవ దేవి సురేశ్వరి || ౨౫ ||

త్రాహి మాం పద్మపత్రాక్షి సత్యే సత్యా భవస్వ నః |
శరణం భవ మే దుర్గే శరణ్యే భక్తవత్సలే || ౨౬ ||

ఏవం స్తుతా హి సా దేవీ దర్శయామాస పాణ్డవమ్ |
ఉపగమ్య తు రాజానమిదం వచనమబ్రవీత్ || ౨౭ ||

శృణు రాజన్ మహాబాహో మదీయం వచనం ప్రభో |
భవిష్యత్యచిరాదేవ సఙ్గ్రామే విజయస్తవ || ౨౮ ||

మమ ప్రసాదాన్నిర్జిత్య హత్వా కౌరవ వాహినీమ్ |
రాజ్యం నిష్కణ్టకం కృత్వా భోక్ష్యసే మేదినీం పునః || ౨౯ ||

భ్రాతృభిః సహితో రాజన్ ప్రీతిం ప్రాప్స్యసి పుష్కలామ్ |
మత్ప్రసాదాచ్చ తే సౌఖ్యమ్ ఆరోగ్యం చ భవిష్యతి || ౩౦ ||

యే చ సఙ్కీర్తయిష్యన్తి లోకే విగతకల్మషాః |
తేషాం తుష్టా ప్రదాస్యామి రాజ్యమాయుర్వపుస్సుతమ్ || ౩౧ ||

ప్రవాసే నగరే చాపి సఙ్గ్రామే శత్రుసఙ్కటే |
అటవ్యాం దుర్గకాన్తారే సాగరే గహనే గిరౌ || ౩౨ ||

యే స్మరిష్యన్తి మాం రాజన్ యథాహం భవతా స్మృతా |
న తేషాం దుర్లభం కిఞ్చిదస్మిన్ లోకే భవిష్యతి || ౩౩ ||

య ఇదం పరమస్తోత్రం భక్త్యా శృణుయాద్వా పఠేత వా |
తస్య సర్వాణి కార్యాణి సిధ్ధిం యాస్యన్తి పాణ్డవాః || ౩౪ ||

మత్ప్రసాదాచ్చ వస్సర్వాన్ విరాటనగరే స్థితాన్ |
న ప్రఙ్ఞాస్యన్తి కురవః నరా వా తన్నివాసినః || ౩౫ ||

ఇత్యుక్త్వా వరదా దేవీ యుధిష్ఠిరమరిన్దమమ్ |
రక్షాం కృత్వా చ పాణ్డూనాం తత్రైవాన్తరధీయత || ౩౮ ||