దశావతారస్తుతీ

॥ దశావతారస్తుతీ ॥

 ప్రోష్ఠీశవిగ్రహ సునిష్ఠీవనోద్ధత విశిష్టామ్బుచారిజలధే  ।
కోష్ఠాన్తరాహితవిచేష్టాగమౌఘ పరమేష్ఠీడిత త్వమవమామ్  ।
ప్రేష్ఠార్కసూనుమనుచేష్ఠార్థమాత్మవిదతీష్టో యుగాన్తసమయే  ।
స్థేష్ఠాత్మశృఙ్గధృతకాష్ఠామ్బువాహన వరాష్టాపదప్రభతనో  ॥ ౧॥

ఖణ్డీభవద్బహుళడిణ్డీరజృమ్భణ సుచణ్డీ కృతో దధి మహా  ।
కాణ్డాతి చిత్ర గతి శౌణ్డాద్య హైమరద భాణ్డా ప్రమేయ చరిత  ।
చణ్డాశ్వకణ్ఠమద శుణ్డాల దుర్హృదయ గణ్డా భిఖణ్డాకర దో-
శ్చణ్డా మరేశహయ తుణ్డాకృతే దృశమఖణ్డామలం ప్రదిశ మే  ॥ ౨॥

కూర్మాకృతే త్వవతు నర్మాత్మ పృష్ఠధృత భర్మాత్మ మన్దర గిరే  ।
ధర్మావలమ్బన సుధర్మాసదాకలితశర్మా సుధావితరణాత్  ।
దుర్మాన రాహుముఖ దుర్మాయి దానవసుమర్మాభిభేదన పటో  ।
ధర్మార్క కాన్తి వర వర్మా భవాన్ భువన నిర్మాణ ధూత వికృతిః  ॥ ౩॥

ధన్వన్తరేఽఙ్గరుచి ధన్వన్తరేఽరితరు ధన్వన్స్తరీభవసుధా-
భాన్వన్తరావసథ మన్వన్తరాధికృత తన్వన్తరౌషధనిధే  ।
దన్వన్తరఙ్గశుగుదన్వన్తమాజిషు వితన్వన్మమాబ్ధి తనయా  ।
సూన్వన్తకాత్మహృదతన్వరావయవ తన్వన్తరార్తిజలధౌ  ॥ ౪॥

యా క్షీరవార్ధిమథనాక్షీణదర్పదితిజాక్షోభితామరగణా-
పేక్షాప్తయేఽజని వలక్షాంషుబిమ్బజిదతీక్ష్ణాలకావృతముఖీ  ।
సూక్ష్మావలగ్నవసనాక్షేపకృత్కుచ కటాక్షాక్షమీకృతమనో-
దీక్షాసురాహృతసుధాక్షాణినోఽవతుసు రూక్షేక్షణాద్ధరితనుః  ॥ ౫॥

శిక్షాదియుఙ్నిగమ దీక్షాసులక్షణ పరిక్షాక్షమావిధిసతీ  ।
దాక్షాయణీ క్షమతి సాక్షాద్రమాపినయ దాక్షేపవీక్షణవిధౌ  ।
ప్రేక్షాక్షిలోభకరలాక్షార సోక్షిత పదాక్షేపలక్షితధరా  ।
సాఽక్షారితాత్మతను భూక్షారకారినిటిలాక్షాక్షమానవతు నః  ॥ ౬॥

నీలామ్బుదాభశుభ శీలాద్రిదేహధర ఖేలాఘృతోధధిధునీ-
శైలాదియుక్త నిఖిలేలా కటాద్యసుర తూలాటవీదహన తే  ।
కోలాకృతే జలధి కాలాచలావయవ నీలాబ్జదంష్ట్ర ధరణీ-
లీలాస్పదోరుతర మూలాశియోగివర జాలాభివన్దిత నమః  ॥ ౭॥

దమ్భోలితీక్ష్ణనఖ సమ్భేదితేన్ద్రరిపు కుమ్భీన్ద్ర పాహి కృపయా  ।
స్తమ్భార్భ కాసహనడిమ్భాయ దత్తవర గమ్భీరనాద నృహరే  ।
అంభోధిజానుసరణాంభోజభూపవనకుమ్భీనసేశఖగరాట్  ।
కుమ్భీన్ద్రకృత్తిధర జమ్భారిషణ్ముఖముఖాంభోరుహాభినుత మామ్  ॥ ౮॥

పిఙ్గాక్ష విక్రమ తురఙ్గాది సైన్య చతురఙ్గా వలిప్త దనుజా-
సాఙ్గాధ్వరస్థ బలి సాఙ్గావపాత హృషితాఙ్గా మరాలినుత తే  ।
శృఙ్గారపాదనఖ తుఙ్గాగ్రభిన్న కన కాఙ్గాణ్డపత్తితటినీ-
తుఙ్గాతి మఙ్గల తరఙ్గాభిభూత భజ కాఙ్గాఘ వామన నమః  ॥ ౯॥

ధ్యానార్హ వామనతనోనాథ పాహి యజమానా సురేశవసుధా-
దానాయ యాచనిక లీనార్థవాగ్వశితనానాసదస్యదనుజ  ।
మీనాఙ్కనిర్మలనిశానాథకోటిలసమానాత్మ మౌఞ్జిగుణ కౌ-
పీనాచ్ఛసూత్రపదయానాతపత్రకరకానమ్యదణ్డవరభృత్  ॥ ౧౦॥

ధైర్యామ్బుధే పరశుచర్యాధికృత్తఖలవర్యావనీశ్వర మహా-
శౌర్యాభిభూత కృతవీర్యాత్మజాతభుజవీర్యావలేపనికర  ।
భార్యాపరాధకుపితార్యాజ్ఞయాగలితనార్యాత్మసూగలతరో  ।
కార్యాపరాధమవిచార్యార్యమౌఘజయివీర్యామితా మయి దయా  ॥ ౧౧॥

శ్రీరామలక్ష్మణశుకారామ భూరవతుగౌరామలామితమహో-
హారామరస్తుత యశోరామకాన్తిసుత నోరామనోరథహర  ।
స్వారామవర్యరిపు వీరామయార్ధికర చీరామలావృతకటే ।
స్వారామ దర్శనజమారామయాగతసుఘోరామనోరమలబ్ధకలహ  ॥ ౧౨॥

శ్రీకేశవప్రదిశనాకేశ జాతకపిలోకేశ భగ్నరవిభూ-
తోకేతరార్తిహరణాకేవలార్తసుఖధీకేకికాలజలద  ।
సాకేతనాథవరపాకేరముఖ్యసుత కోకేన భక్తిమతులామ్  ।
రాకేన్దు బిమ్బముఖ కాకేక్షణాపహ హృశీకేశ తేఽఙ్ఘ్రికమలే  ॥ ౧౩॥

రామే నృణాం హృదభిరామేనరాశికులభీమే మనోఽద్యరమతామ్  ।
గోమేదినీజయితపోఽమేయగాధిసుతకామేనివిష్ట మనసి  ।
శ్యామే సదా త్వయి జితామేయతాపసజరామే గతాధికసమే  ।
భీమేశచాపదలనామేయశౌర్యజితవామేక్షణే విజయిని  ॥ ౧౪॥

కాన్తారగేహఖలకాన్తారటద్వదన కాన్తాలకాన్తకశరమ్  ।
కాన్తారయామ్బుజనికాన్తాన్వవాయవిధుకాన్తాశ్మభాదిపహరే  ।
కాన్తాలిలోలదలకాన్తాభిశోభితిలకాన్తాభవన్తమనుసా  ।
కాన్తానుయానజిత  కాన్తారదుర్గకటకాన్తా రమాత్వవతు మామ్  ॥ ౧౫॥

దాన్తం దశాననసుతాన్తం ధరామధివసన్తం ప్రచణ్డతపసా  ।
క్లాన్తం సమేత్య విపినాన్తం త్వవాప యమనన్తం తపస్విపటలమ్   ।
యాన్తం భవారతిభయాన్తం మమాశు భగవన్తం భరేణ భజతాత్  ।
స్వాన్తం సవారిదనుజాన్తం ధరాధరనిశాన్తం స తాపసవరమ్  ॥ ౧౬॥

శమ్పాభచాపలవకంపాస్తశత్రుబలసమ్పాదితామితయశాః  ।
శం పాదతామరససమ్పాతినోఽలమనుకమ్పారసేన దిశ మే  ।
సమ్పాతిపక్షిసహజం పాపిరావణహతం పావనం యదకృథాః  ।
త్వం పాపకూపపతితం పాహి మాం తదపి పమ్పాసరస్తటచర  ॥ ౧౭॥

లోలాక్ష్యపేక్షితసులీలాకురఙ్గవధఖేలాకుతూహలగతే  ।
స్వాలాపభూమిజనిబాలాపహార్యనుజపాలాద్య భో జయజయ  ।
బాలాగ్నిదగ్ధపురశాలానిలాత్మజనిఫాలాత్తపత్తలరజో  ।
నీలాఙ్గదాదికపిమాలాకృతాలిపథమూలాభ్యతీతజలధే  ॥ ౧౮॥

తూణీరకార్ముక కృపాణీకిణాఙ్కభుజపాణీరవిప్రతిమభాః  ।
క్షోణిధరాలినిభఘోణీముఖాదిఘనవేణీసురక్షణకరః  ।
శోణిభవన్నయన కోణీజితామ్బునిధిపాణీరితార్హణమణి-
శ్రేణీవృతాఙ్ఘ్రిరిహ వాణీశసూనువరవాణీస్తుతో విజయతే  ॥ ౧౯॥

హుఙ్కారపూర్వమథ టఙ్కారనాదమతిపఙ్కావధార్యచలితా  ।
లఙ్కాశిలోచ్చయవిశఙ్కాపతద్భిదుర శఙ్కాఽఽస యస్య ధనుషః  ।
లఙ్కాధిపోఽమనుత యం కాలరాత్రిమివ శఙ్కాశతాకులధియా  ।
తం కాలదణ్డశతసఙ్కాశకార్ముకశరాఙ్కాన్వితం భజ హరిమ్  ॥ ౨౦॥

ధీమానమేయతనుధామార్తమఙ్గళదనామా రమాకమలభూ-
కామారిపన్నగపకామాహివైరిగురుసోమాదివన్ద్యమహిమా  ।
స్థేమాదినాపగతసీమావతాత్సఖలసామాజరావణరిపూ  ।
రామాభిదో హరిరభౌమాకృతిః ప్రతనసామాదివేదవిషయః  ॥ ౨౧॥

దోషాత్మభూవశతురాషాడతిక్రమజదోషాత్మభర్తృవచసా  ।
పాషాణభూతమునియోషావరాత్మతనువేషాదిదాయిచరణః  ।
నైషాదయోషిదశుభేషాకృదణ్డజనిదోషాచరాదిశుభదో  ।
దోషాగ్రజన్మమృతిశోషాపహోఽవతు సుదోషాఙ్ఘ్రిజాతహననాత్  ॥ ౨౨॥

వృన్దావనస్థపశువృన్దావనం వినుతవృన్దారకైకశరణమ్  ।
నన్దాత్మజం నిహతనిన్దాకృదాసురజనం దామబద్ధజఠరమ్  ।
వన్దామహే వయమమన్దావదాతరుచిమాన్దాక్షకారివదనమ్  ।
కున్దాలిదన్తముత కన్దాసితప్రభతనుం దావరాక్షసహరమ్  ॥ ౨౩॥

గోపాలకోత్సవకృతాపారభక్ష్యరససూపాన్నలోపకుపితా  ।
శాపాలయాపితలయాపామ్బుదాలిసలిలాపాయధారితగిరే  ।
స్వాపాఙ్గదర్శనజ తాపాఙ్గరాగయుతగోపాఙ్గనాంశుకహృతి-
వ్యాపారశౌణ్డ వివిధాపాయతస్త్వమవ గోపారిజాతహరణ  ॥ ౨౪॥

కంసాదికాసదవతంసావనీపతివిహింసాకృతాత్మజనుషమ్  ।
సంసారభూతమిహ సంసారబద్ధమనసం సారచిత్సుఖతనుమ్  ।
సంసాధయన్తమనిశం సాత్త్వికవ్రజమహం సాదరం బత భజే  ।
హంసాదితాపసరిరంసాస్పదం పరమహంసాదివన్ద్యచరణమ్  ॥ ౨౫॥

రాజీవనేత్ర విదురాజీవ మామవతు రాజీవకేతనవశమ్  ।
వాజీభపత్తినృపరాజీరథాన్వితజరాజీవగర్వశమన  ।
వాజీశవాహ సితవాజీశ దైత్యతనువాజీశభేదకరదోః  ।
జాజీకదమ్బనవరాజీవముఖ్యసుమరాజీసువాసితశిరః  ॥ ౨౬॥

కాలీహృదావసథకాలీయకుణ్డలిపకాలీస్థపాదనఖరా  ।
వ్యాలీనవాంశుకరవాలీగణారుణితకాలీరుచే జయ జయ  ।
కేలీలవాపహృతకాలీశదత్తవరనాలీకదృప్తదితిభూ-
చూలీకగోపమహిలాలీతనూఘుసృణధూలీకణాఙ్కహృదయ  ॥ ౨౭॥

కృష్ణాదిపాణ్డుసుతకృష్ణామనఃప్రచురతృష్ణాసుతృప్తిక రవాక్  ।
కృష్ణాఙ్కపాలిరత కృష్ణాభిధాఘహర కృష్ణాదిషణ్మహిళ భోః  ।
పుష్ణాతు మామజిత నిష్ణాతవార్ధిముదనుష్ణాంశుమణ్డల హరే  ।
జిష్ణో గిరీన్ద్రధర విష్ణో వృషావరజ ధృష్ణో భవాన్కరుణయా  ॥ ౨౮॥

రామాశిరోమణిధరామాసమేత బలరామానుజాభిధ రతిమ్  ।
వ్యోమాసురాన్తకర తే మారతాత దిశ మే మాధవాఙ్ఘ్రికమలే  ।
కామార్తభౌమపురరామావలీప్రణయవామాక్షిపీతతనుభా  ।
భీమాహినాథముఖవైమానికాభినుత భీమాభివన్ద్యచరణ  ॥ ౨౯॥

సక్ష్వేళభక్ష్యభయదాక్షిశ్రవోగణజలాక్షేపపాశయమనమ్  ।
లాక్షాగృహజ్వలనరక్షోహిడిమ్బబకభైక్షాన్నపూర్వవిపదః  ।
అక్షానుబన్ధభవరూక్షాక్షరశ్రవణసాక్షాన్మహిష్యవమతీ  ।
కక్షానుయానమధమక్ష్మాపసేవనమభీక్ష్ణాపహాసమసతామ్  ॥ ౩౦॥

చక్షాణ ఏవ నిజపక్షాగ్రభూదశశతాక్షాత్మజాదిసుహృదా-
మాక్షేపకారికునృపాక్షౌహిణీశతబలాక్షోభదీక్షితమనాః  ।
తార్క్ష్యాసిచాపశరతీక్ష్ణారిపూర్వనిజలక్ష్మాణి చాప్యగణయన్  ।
వృక్షాలయధ్వజరిరక్షాకరో జయతి లక్ష్మీపతిర్యదుపతిః  ॥ ౩౧॥

బుద్ధావతార కవిబద్ధానుకమ్ప కురు బద్ధాఞ్జలౌ మయి దయామ్  ।
శౌద్ధోదనిప్రముఖసైద్ధాన్తికాసుగమబౌద్ధాగమప్రణయన  ।
క్రుద్ధాహితాసుహృతిసిద్ధాసిఖేటధర శుద్ధాశ్వయాన కమలా  ।
శుద్ధాన్త మాం రుచిపినద్ధాఖిలాఙ్గ నిజమద్ధావ కల్క్యభిధ భోః  ॥ ౩౨॥

సారఙ్గకృత్తిధరసారఙ్గవారిధర సారఙ్గరాజవరదా-
సారం గదారితరసారం గతాత్మమదసారం గతౌషధబలమ్  ।
సారఙ్గవత్కుసుమసారం గతం చ తవ సారఙ్గమాఙ్ఘ్రియుగలమ్  ।
సారఙ్గవర్ణమపసారం గతాబ్జమదసారం గదింస్త్వమవ మామ్  ॥ ౩౩॥

గ్రీవాస్యవాహతనుదేవాణ్డజాదిదశభావాభిరామచరితమ్  ।
భావాతిభవ్యశుభధీవాదిరాజయతిభూవాగ్విలాసనిలయమ్  ।
శ్రీవాగధీశముఖదేవాభినమ్యహరిసేవార్చనేషు పఠతా-
మావాస ఏవ భవితావాగ్భవేతరసురావాసలోకనికరే  ॥ ౩౪॥

ఇతి శ్రీమద్వాదిరాజపూజ్యచరణ విరచితం
శ్రీదశావతారస్తుతిః సమ్పూర్ణమ్
 భారతీరమణముఖ్యప్రాణాన్తర్గత శ్రీకృష్ణార్పణమస్తు