రక్షా బంధన్‌ - చంద్ర గ్రహణం

రక్షా బంధన్‌కు చంద్ర గ్రహణం ఎఫెక్ట్!

 అన్నా చెళ్లుల్లు, అక్కా తమ్ముళ్లకు ఆత్మీయ పండుగ రక్షా బంధన్. ఈ పవిత్రమైన రోజున ఆడపడచులు వారి తమ్ముళ్లు, అన్నలకు రాఖీ కట్టి వారితో తమ అనుబంధాన్ని చాటుకుంటారు. అన్నా, తమ్ముళ్లు తమకు జీవితాంతం రక్షణగా ఉండాలని కోరుకుంటూ రాఖీ కట్టి దేవుణ్ని ప్రార్థిస్తారు. మరి ఇలాంటి పవిత్రమైన రోజున ఈసారి చంద్రగ్రహణం కూడా వస్తోంది. చంద్రగ్రహణం రోజు రాఖీ కట్టడం, కట్టించుకోవడం అరిష్టమని, మంచిది కాదని ఇప్పటికే రూమర్లు షికార్లు చేస్తున్నాయి. దీనిపై పండితులు కూడా తలోమాట చెబుతుండటం ఆందోళన కలిగిస్తోంది. అయితే గ్రహణం సమయంలో మూడనమ్మకాల జోలికి వెళ్లొద్దని ఖగోళ శాస్త్రవేత్తలు సూచిస్తున్నారు.

చంద్ర గ్రహణం సమయంలో సోదరులకు రాఖీ కట్టడం వల్ల ఎలాంటి దుష్ర్పభావం ఉండదని, అసలు గ్రహణానికి రక్షా బంధన్‌కు సంబంధమే లేదంటున్నారు. సోమవారం, మంగళవారం దేశ వ్యాప్తంగా పాక్షిక చంద్రగ్రహణం ఏర్పడుతుంది. సోమవారం రాత్రి 9.18 గంటలకు చంద్రగ్రహణం ప్రారంభమై మంగళవారం తెల్లవారుజామున 2.20 గంటలకు ముగుస్తుంది. అయితే రక్షాబంధన్‌కు గ్రహణానికి ఎలాంటి సంబంధంలేదు. ఇది కేవలం సోదరీ సోదరీమణుల మధ్య ప్రేమానురాగాలకు మాత్రమే సంబంధించినడిది.